• بیزیم ضیالی و ملی فعاللاریمیز و جنوبی آذربایجان تلویزیونو بیر خشونت سیز و دمکراتیک شرایطده دیرکی حقیقت جارچی سینا چئوریلیب و اونلاری دینله ین ملت داها هچ بیر مقدسلشمه نی هرچند کی گویدن ده نازیل اولونا و یا تاریخدن ویا جمکران قویوسوندان چیخا قبول اتمه یه جاقلار ...

اخبار روز: www.iran-chabar.de
سه‌شنبه  ۴ فروردين ۱٣٨٨ -  ۲۴ مارس ۲۰۰۹

هم میهنان فارسی زبانم،
از اینکه مقاله ترکی من از طریق سایتهای فارسی زبان در اختیار خوانندگان قرار می گیرد، بسیار خوشحالم. چاپ مقالات بزبانهای سایر اقوام و ملیتهای ایران در سایتهای فارسی زبان تجلی دمکراتیسم ومحترم شمردن حقوق ملیتها و اقوام از جانب آنهاست.
   هرروزتان نوروز، نوروزتان پیروز.


   آذربایجان ضیالیلاری، ملی فعاللار و وطنیمیمیزده کئچن پروسه لره مسئول یاناشان بوتون آذربایجانلیلار!
   سیز- هر هانسی تشکیلاتا باغلی اولورسانیز، اولون! اما اگر ملی حرکتیمیزین موفقیتینی دوشونورسوز، ایکی بازار گونو گون آذ تی وی نین پروگراملارینی سیر ائتدیکده، منیم نگرانچیلیغیمی باشا دوشرسیز:
موضوع سیروس مددی نین کلن شهرینده ۲۱ آذر مناسبتی ایله چیخیشی؛ وئریلیشین آپاریجیسی- احمد بیگ اوبالی ؛ فیکیرینی مدافعه ائده ن- سیروس بیگ مددی.
   بو مباحثه لرده کئچن بیر سیرا مسئله لر، منی اولدوقجا نگران ائدیر.
بیزیم جامعه میزین هر بیرشئیدن اونجه خشونت سیز دانیشیقلارا- مباحثه لره احتیاجی وار. بو احتیاج، انسانین هاوایا اولان احتیاجیندان داها آرتیق دیر! بیر خشونت سیز، آچیق سیمالی ( نه قره قاباقلی ) محبتلی ( نه نفرتلی ) و مختلف فکرلی دانیشیقلارا محتاجیق.
خشونتین اولکه میزین هر بیر یئرینده بیر درین کوکو واردیر. او زماندان کی بیزی اوزلوگوموزدن آییریب، دیلیمیز ، فزهنگیمیز ، اقتصادیاتیمیزی الیمیزدن آلیب، بیزی یامان گونه سالیبلار و بیز   وارلیغیمیزی دیرناغلاریمیزلا قوروماغا مجبور اولموشوق، ائله او زاماندان خشونت ده بیزه تحمیل اولوب و حیاتیمیزلا عجین اولموشدور. بیزیم مبارزه میز نه قدر کی کوتلوی مبارزه یه چئوریلمه ییب، اکثر حاللاردا خشونتله باغلیدیر. اما ملی فورم تاپان زمان ( مثلا خرداد حرکاتیندا) خشونت سیز بیر حرکته چئوریلیر.
   ساغلام دوشونجه ایچون آزاد فکر لازم دیر. توتالیتر فکرلی هموطنلریمیز ایسته ییرلر کی هامی اونلارین ایناندیقلارینا (ایدئولوژی، دینی و ایمانی فکرلرینه)، اونلارین مقدساتینا اینانسینلار. اونلار تاریخی و سیاستی ایمانا   چئوریرلر. داواملی قهرمانلاردان، شهیدلردن، رسالت گتیرنلردن و... خالقا و ملتَه ایماندان صحبت ائدیرلر. تاریخی و سیاستی ایمانا چئویردیکلری زامان، گرچکلیکدن- واقعیتدن اوزاق دوشورلر. و بو حالتده منطق و استدلال یئرینه بویونلارینین دامارلاری شیشیر، سس لرینین تونو ده گیشیلیر و باشقالارینین فکر و دوشونجه لرینه هئچ بیر امکان وئرمیرلر. زوراکیلیق اورتایا چیخیر و کینه و نفرت که نتیجه سی خشونت اولا هر طرفی بورویور.
یوخاریدا دئدیگیم کیمی بیزیم جامعه میز دمکراتیک اولکه اولماییبدیر. بو، تاریخ بویو دیکتاتورلوق و راسیزم آلتیندا ازیلن بیر جامعه دی. بوردا بیر کیچیک سهوه یول وئرمک، بویوک فاجعه لر یارادا بیلر.
عزیز ضیالی لاریمزو ملی فعالاریمز اگر الیمیزی ال اوستونه قویوب و تام صبریله باخاق اوندادکی گله جکده بوگونوموزو اوزوموزه باغشلامیاجیوق. من بو مسولیتی تأسفله شمالی آذربایجان ضیالی لارندا دا آز گورورم. اونلار شخصیته پرستش دوورنو کچیریبلر و اونون ایستیسینی و سویوقونو گوروبلر. حسین جاویدلر و میکائیل مشفیقلر خاطره لری وار. سیبریه سورگون اولانلاری ائشیدیب ویا گوروبلر. بونیلا بئله دولت آپاراتی ضیالیلار سکوتوندا ویا تائید ینده ابدی پرزیدنتلیغی رفراندوما قویورلار. اورادا اله بیرکی آذربایجان تاریخی علی اف لار لا باشلایب. منیم بوردا سوزوم اورانن ضیالیلاریدیر کی هر سوزلرینین باشلانجیندا وسُونوندا اولو اوندر و یولونون داوامچسی و خانمیسی نین آدی دیلریندن دوشمور. بو وضعیت گوره ک گله جک نسله نه ارمغان گتیره جک؟ هرنه اولسادا دمکراسی شک و شبهه آلتیندا دیر و بو وضعیته سوسان ضیالیلار دا سهیم دیلر.
    اگر هر بیریمیز اوز دوره میزه بیر تعصب دوواری چکیب (بیرسی پیشه وری ، اوبیرسی محمدامین رسولزاده و باشقاسی شریعتمداری و ...) و اوزموزو اونون ایچینده زندانی ائلیاق، اگر پیشه وری ویا دیگرینی بیر بوتا چئوریب گویلره چیخاریب و مقدسله شدیراخ، اگر او داهی لرین آیاخلارینی یئرلردن وزاماندان آییراخ، اوندا اونلارین آماللارنی کی میلتیمیزی تعصبدن و نادانلقیدان چخاتماق ایدی، اونوداجاغیق. نهایت (اگرائلیه بیلساخ) کوتلنی آچیق آغزلا و یومروقلا نه دوشونجه    ایله یولا سالاجاغوق. اوندادکی کئچمیش سهولر یئنه ده تکرار اولاجاق و ملتیمیز دئمک بیر بورولقانا دوشه جک کی داها چیخیش یولو چوخ چتین اولاجاق نئجه کی ایندی یه ده ک ائله گئدیب.
    من بئله دشونورم کی ضیالی دِئدیکده گره ک اوز فکرینه تعصبله یاناشمایا. انسا نین فکریده دییشر. او شِئی کی دییشمز، دییشمه نین اوزودور. هربیر مسئله یه جوابی اولان و اوزنوده بیر تحقیقه احتیاج گورمه ین ضیالی یه، ضیالی یوخ بلکه زییانلی دمک لازیمدر. بئله زییانلی لار دئمک خشونتی میلتیمیزین ایچنده کوکونو داها درینه سالیرلار. هئچده بئله دییل کی ملت مقدس و پاک دیر و سهوه یول وئرمز. تاریخ ثابت ائله ییب کی ملتده بیر نئچه توتالیتر فکرلی زییانلی لار الینده تکجه آچیق آغیز باغیرماق اوچون و یومروق حربه چکمک اوچون (حزب الله قورومو) اولور.
    بیزیم ملتمیزین دردی شورون اولمادغی یوخ بلکه شعورون و عقلین کولگه ده قالماسی دیر. بو شعور و مدرک لیق آنجاق بیر اجتماعی و مدنی تجربه دن اله گلر کی بودا فارس راسیستلری نین سایه سینده زامان سوره ر. توتاق کی فحله حرکاتی : نه مستقل صنفی تشکیلاتی وار نه جمعی مدنی مبارزه امکانی. بس هارادان بو تجربه نی قازاناجاق؟ بئله بیر شرایطده یا سوسماق ویا پارتلایش دئر. بو درده چاره قیلماق لازیمدر. تامام انقلاب لارین نتیجه سی گوز قاباغیندادی. الولو چیخشلار، آتشین دانیشقلار آنجاق ملتمیزی بیر داها تعقلدن اوزاقلاشدراجاق.
    بیرینی سول دامغاسی دیگری نی هیتلرچی فاشیست دامغاسی آنجاق بیزی دوشونمکدن کنارا سالار و کوتله نی بیرطرفلی، منطق سیز و اجتماعی دشونجه تجربه سینه مالک اولمایان بارا گتیره ر. بیزیم ملی فعاللاریمیز اگر باشقاسینی کئچمیشی سولچو لنینیست اولدوغونا گوره اتهاملایرلار و هر صحبت باشی موضوعدان یایندرماقدان اوتور لنین واستالین صحبتی نی آرایا بوراخیرلار و بونو دا بیلیرلرکی صحبت طرفی چُوخداندی او ایدئولوژی دان فاصله آچیب. بو نتیجه یه گلمک اولار کی بو ئوزده بیر ایدئولوژی دیر کی دنیا سطحینده معین دایره لر طرفیندن هدایت اولونور. بو دئمک ملتمیزی قیزدیرماقدان و تعصبه سالمادان سونرا هچ بیر نتیجه سی یوخدور. بو ایش بیزی هربیر طرفه چکر الا فکر مبارزه سینه.
    اساسندا آکادمیک مباحثه گرک آکادمیک سویه سینده قالا و حتا سیاسی مباحثه ایله قاریشمایا تا پوپولیزم سوءاستفاده معنا سندا کوتله ایچینه یول آچمایا.
    ایندی کی بیر اینفورماتیک انقلابی نتیجه سینده دنیامیز بیر بالاجا کنده چئوریلیب بیز بو امکانلاردان استفاده ائدره ک ملی مبارزه میزی گره ک بیر ساغلام جهته یونه لداخ. گرک بیر خشونت سیز دنیانن جارچسی اولاخ. بیزیم ملی حرکتمیزی مدنی دنیانین بیر عضوونه چئویرک. اونسوزدا دنیانین هر بیر یرینده بیر خشونتدن سوز گئدیرسه بیر طرفی بیزیم ئولکه لریمیزین آیاغینین ایزی تاپلار.
   سوزمو کنکرتلشدیریم. توتاق سیروس بیگ مددی جنابلارنن آچدیغی مباحثه ده عزیز دستوم آکادمیک- تاریخی مباحثه نی، آکادمیک سویه ده ساخلامایب و بحثی درینلشدیرمدن سیاسی نتیجه آلیب. بودا ئوزنه عکس صدا یا باعث الوب. دستوموزو جمهوری اسلامی همکاریندان توتموش تا هده له مه یه ده ک گئدیبلر. احمد بیگ اوبالی دا هده له یه نی تومارلیه تومارلیه ساکت اولماغا دعوت ائله دی.
    عزیزلریم ، آذربایجان ضیالیلاری و ملی فعالاریمیز. خشونت دئدیکده تکجه چُماق و تفنگ دییل. بیر دانیشق طرزی ده الیه بیلر خشونتلی اولسون. خشونت سیز مبارزه بیر درین فلسفی معنایا مالکدیر.
       داها بیر مثال: من بو مقاله ده گون آذ تی وی نین بو نئچه ایل عرضینده مثبت ایشلریندن دانیشمیرام، چون بو جنوبی آذربایجان تلویزیونی بیر نئچه حزبین ایشینی گوروب و داها دوغروسو یئری گلمیشکن نهایت تشکر لریمی بو تلویزیونو دولاندیرانلاردان بیلدیرمک ایستردم. واما ایندی صحبتیم تنقیددن گئدیر.
گون آذ بو نئچه ایل فعالیتی ایچنده باخاق کرد خالقی ایله بیزیم ملت آراسندا نفرتی قالدیرمادا نه آددیملار آتیب. هابئله دیگر خالقلارلا. گون آذ تی وی سراسری تشکیلاتلارا نفرتی درین لشدیرمه ده نه رولو اوینایب. گون آذ تی وی بعضی یالنش احوال و روحیه نی قالدیرماغا هانسی تبلیغاتی یولا سالیب. باخین بو بیزیم حرمتیمزی بسله دیغی عزیز رسام و شاعر مزین دانیشقیدر: « اگربوتون دنیادا فقط بیر دانا تورک اولا اما قانیندا تورک قانی اولا ها، بو داماردا تورک قانی اولا.....». گون آذ تی وی بو احوال روحیه نی یوموشاتمادا نه رولو اوینایب؟ طبیعی دیرکی بیر سیرا چاتیشمامازلیقلار اولار اما گون آذ بیر سیرا سهولره یول وئرمه مه لیدیر. اگرسراسری تشکیلاتلارین بیر چوخونو کی فارس راسیستی خسته لیگینه دچار دیرلار کئچساخ، چوخلاری دا واردیلار کی اونلارلا فکر بیرلیی قاباغا آپارماق اولار و اونلاردا بیر باشقا باخیشدان بیزیم ملی باخیشیمیزا یئتیشه رلر و یا یتیشه بیلرلر.
    بو تلویزیونون بیر منسجم خشونت سیزباخیشی اولارسا اوندا داها مثبت بیزیم ملی حرکتیمزین فورمالاشماسندا رول اوینایا بیلر. یئنه ده کنکرت دئسک بو ایکی بازار گونو (یکشنبه) اگر شیر محمد معلم و نسیمان بیگ یعقوبلو و دیگرلری و سیروس بیگ مددی اشتراکیله بیردییرمی ماسا (میزگرد) تشکیل اولسایدی بیر دوزگون نتیجه یه یئتیشه بیلردوخ و یا او کی کئچدی؟
    قایدیم یئنه ده سوزومون اولینه. بیزیم ملی حرکتیمیزین باش سوزو گره ک «خشونت سیز ملی حرکت» اولا. بیزیم حقیمیز یوخدور کی آدیمیزی ضیالی و یا ملی فعال قویوب و " تقیه " یه یول وِئراخ. خشونتین ایزینی ائله، کینه ده و نفرت ده گورمک اولار. ایمان گتیر مک هر بیر فکرده دئمه لی عقلین و شعورون یولونو باغلار و امکان وئره رکی هوللوک بازلار میداندار اولسونلار. اما شک ائتمک حقیقتین آچاریدر. بیز ملی فعاللار و ضیالی لار ملتیمیزین شعورلو وعقللی حرکتینه اینانمالی یوخ. اونا گوره شخصیتلریمزی مقدسلشدیرمک ، اونلاری پیغمبر ائتمک عقل و شعورون قاباغین آلاندی. بیز گرک هربیرتاریخی شخصیتلریمزه ویا تاریخی حادثه لره اوز زامان و مکانیندا علمی باخیمدان قیمت وئره ک. بیر سیرا آیه لرله و احکاملارلا که هئچ زمان دیشمیرلر دنیانی گورمک انسانلیغا حرمتسیزلیک و ضد در.
    فکر آیرلیغیندا و دارتشماسیندا اگر مقصدیمیز حقیقته یول آچماق اولماسا اوندا اوبیر بوُش بوُغازلیق اولاجاق. فکر آیرلیغینی بیز گره ک عزیز توتاق. اودورکی بیزه حقیقت یولونو ایشقلاندیرار. اگر فکر آیرلیغیندان نفرت و دشمنچلیک چیخارسا اوندا او بیزیم ملی بیرلییمزه زهردیر.
    ملی بیرلیک و همرأی لیک اوردا دییل کی هامی منیم فکریمین آلتیندا بیرلشسینلر و هر بیر باشقا فکرده دشمن ایزی آختاراق وتوطئه تئوروسونا ایناناق. بلکه هم رأی لیک مختلف فکرلرین بیر خشونت سیز دانیشقینن نتیجه سی دیر. حقیقت هچ کسین انحصاریندا دییل. و بو حقیقته چاتماق فکر صاحبلرینین بیر منطقی دانیشق یولو ایله اله گلر.
    بیزیم ضیالی و ملی فعاللاریمیز و جنوبی آذربایجان تلویزیونو بیر خشونت سیز و دمکراتیک شرایطده دیرکی حقیقت جارچی سینا چئوریلیب و اونلاری دینله ین ملت داها هچ بیر مقدسلشمه نی هرچند کی گویدن ده نازیل اولونا و یا تاریخدن ویا جمکران قویوسوندان چیخا قبول اتمه یه جاقلار.

kuchebagli.s@googlemail.com